ಟ್ವಿಟ್ಟರ್, ಫೇಸ್ ಬುಕ್​ನಲ್ಲೂ ಗ್ಯಾಸ್ ಸಿಲಿಂಡರ್ ಬುಕ್ ಮಾಡಿ..! ಹೇಗೆ ಅಂತಿರಾ…?

ಮೋದಿ ಅವರ ಸರ್ಕಾರ ಅಧಿಕಾರಕ್ಕೆ ಬಂದ ನಂತರ ಎಲ್ಲವೂ ಡಿಜಿಟಲ್ ಆಗುತ್ತಿದ್ದು, ಡಿಜಿಟಲ್​ ಇಂಡಿಯಾದ ಆಶಯಕ್ಕೆ ತಕ್ಕಂತೆ ಗ್ಯಾಸ್​ ಕಂಪೆನಿಗಳೂ ಕೂಡ ಡಿಜಿಟಲ್​ ಆಗುತ್ತಿದೆ. ಗ್ರಾಹಕ ಸ್ನೇಹಿಯಾಗಲು ಇಂಡಿಯನ್​ ಆಯಿಲ್​ ಕಾರ್ಪೊರೇಷನ್​ ತನ್ನ ಗ್ರಾಹಕರಿಗೆ ಹೊಸ ಸೌಲಭ್ಯಗಳನ್ನ ನೀಡುತ್ತಿದೆ. ಗ್ರಾಹಕರು ಇನ್ನು ಮುಂದೆ ತಮ್ಮ ಟ್ವಿಟ್ಟರ್​ ಮತ್ತು ಫೇಸ್​ಬುಕ್​ ಖಾತೆಗಳನ್ನು ಬಳಸಿ ಗ್ಯಾಸ್​ ಸಿಲೀಂಡರ್​ ಗಳನ್ನು ಬುಕ್​ ಮಾಡಬಹುದಾಗಿದೆ.

ಫೋನ್​ ಕರೆ/ ಎಸ್​ಎಂಎಸ್​ ಮೂಲಕ ಬುಕ್ಕಿಂಗ್​ ಮಾಡುವ ವ್ಯವಸ್ಥೆ ಈಗಾಗಲೇ ಜಾರಿಯಲ್ಲಿದ್ದು, ಇದಕ್ಕೆ ಪೂರಕವಾಗಿ ಗ್ಯಾಸ್​ ಕಂಪೆನಿಗಳು ಇನ್ನಷ್ಟು ಸರಳವಾಗುವಂತಹ ಸೌಲಭ್ಯವನ್ನು ನೀಡಲು ಮುಂದಾಗಿದೆ. ಈಗಾಗಲೇ ತಮ್ಮ ಮೊಬೈಲ್​ ಮೂಲಕವಾಗಿ ಬುಕ್​ ಮಾಡುವುದರ ಜೊತೆಗೆ ಈ ಸಾಮಾಜಿಕ ಜಾಲ ತಾಣಗಳಲ್ಲಿಯೂ ಬುಕ್​ ಮಾಡುವ ವ್ಯವಸ್ಥೆಯಿಂದಾಗಿ ಗ್ರಾಹಕರು ಗ್ಯಾಸ್​ಗಾಗಿ ಸರತಿ ಸಾಲಿನಲ್ಲಿ ನಿಲ್ಲುವುದು ತಪ್ಪಿದಂತಾಗಿದೆ.

ಫೇಸ್​ ಬುಕ್​, ಟ್ವಿಟ್ಟರ್​ನಲ್ಲಿ ಬುಕ್​ ಮಾಡುವುದು ಹೇಗೆ..?

ಫೇಸ್​ ಬುಕ್​ ಲಾಗಿನ್​ ಆಗಿ, ನಂತರ @indianoilcorplimited ಎಂದು ಟೈಪ್​ ಮಾಡುವ ಮೂಲಕ ಇಂಡಿಯನ್​​ ಆಯಿಲ್​ ಕಾರ್ಪೋರೇಷನ್​​ ಲಿಮಿಟೆಡ್​ನ ಅಧಿಕೃತ ಪೇಜ್​ಗೆ ಭೇಟಿ ನೀಡಿ. ಆ ಪೇಜ್​ನಲ್ಲಿ ಬುಕ್​ ನವ್​ (book now) ಎನ್ನುವ ಲಿಂಕ್​ ಅನ್ನು ಕ್ಲಿಕ್​ ಮಾಡಿ. ನಂತರ ನಿಮ್ಮ ಗ್ಯಾಸ್​ ಕನೆಕ್ಷನ್​ ನಂಬರ್​ ಸೇರಿದಂತೆ ಕೆಲ ಮಾಹಿತಿಗಳನ್ನು ನೀಡಿದರೆ ನಿಮ್ಮ ಗ್ಯಾಸ್​ ಬುಕ್​ ಆಗುತ್ತದೆ.

ಟ್ಡಿಟ್ಟರ್​ನಲ್ಲಿ ಬುಕ್​ ಮಾಡುವುದು ಹೇಗೆ..?

ಫೇಸ್​ ಬುಕ್​ ನಂತೆಯೇ ಟ್ವಿಟ್ಟರ್​ನಲ್ಲಿಯೂ ಮೊದಲು ಲಾಗಿನ್​ ಆಗಬೇಕು ನಂತರ ಬುಕ್​ ಮಾಡುವುದಕ್ಕಾಗಿ refill @indanerefill ಎಂದು ಟ್ವಿಟ್​ ಮಾಡಬೇಕು. ಒಂದು ವೇಳೆ ನೀವು ಮೊದಲ ಬಾರಿಗೆ ಬುಕ್​ ಮಾಡುತ್ತಿದ್ದರೆ, LPGID ಎಂದು ಟ್ವಿಟ್​ ಮಾಡಿ ಟ್ವಿಟ್ಟರ್​ನಲ್ಲಿ ನೊಂದಾಯಿಸಿಕೊಳ್ಳಬೇಕು. ಈ ವಿಧಾನ ಅತ್ಯಂತ ಸರಳವಾಗಿದ್ದು ಸುಶಿಕ್ಷಿತರಿಗೆ ಅನುಕೂಲವಾಗಲಿದೆ.

ಹಳೆಯ ವ್ಯವಸ್ಥೆಯೂ ಇರುತ್ತದೆ…!

ಈಗಾಗಲೇ ಗ್ರಾಹಕರು ಬಳಕೆ ಮಾಡುತ್ತಿರುವ ಫೋನ್​ ಮತ್ತು ಎಸ್​ ಎಂ ಎಸ್​ ಬುಕಿಂಗ್​ ಸೇವೆಯೂ ಚಾಲ್ತಿಯಲ್ಲಿರುತ್ತದೆ. ಸಾಂಪ್ರದಾಯಿಕ ಬಳಕೆದಾರರು ಇದರಲ್ಲಿ ಕೂಡ ಬುಕ್​ ಮಾಡಬಹುದಾಗಿದೆ. ಇನ್ನು ಈ ಸೇವೆಯನ್ನು ಮುಂದಿನ ದಿನಗಳಲ್ಲಿ ವಾಟ್ಸಾಪ್​ಗೂ ವಿಸ್ತರಿಸಲು ಮುಂದಾಗಿದ್ದು ಆ ನಿಟ್ಟಿನಲ್ಲಿ ಕೆಲಸಗಳು ನಡೆಯುತ್ತಿವೆ ಎಂದು ತಿಳಿದು ಬಂದಿದೆ. ಒಟ್ಟಿನಲ್ಲಿ ಡಿಜಿಟಲ್​ ಕ್ರಾಂತಿಯಿಂದಾಗಿ ಇಂದು ಒಂದು ಮೊಬೈಲ್​ ಇಟ್ಟುಕೊಂಡಿದ್ದರೆ ಸಾಕು ಎಲ್ಲಾ ಕೆಲಸವೂ ಕುಳಿತಲ್ಲಿಯೇ ಆಗುವಂತಹ ವ್ಯವಸ್ಥೆ ಬಂದಿದೆ.