ಮಕ್ಕಳ ಜೀವಕ್ಕೆ ಎರವಾಗುತ್ತಿವೆಯೇ ಧಾರವಾಹಿಗಳು

ಸೀರಿಯಲ್​ನಲ್ಲಿ ನಾಯಕಿ ಬೆಂಕಿ ಹಚ್ಚಿಕೊಂಡು ನೃತ್ಯ ಮಾಡುವ ದೃಶ್ಯವನ್ನು ವೀಕ್ಷಿಸಿದ ಪ್ರಾರ್ಥನಾ ಆ ದೃಶ್ಯವನ್ನು ಅನುಕರಿಸಲು ಹೋಗಿ, ತನಗೆ ತಾನೇ ಬೆಂಕಿ ಹಚ್ಚಿಕೊಂಡಿದ್ದಾಳೆ ಎಂದು ಪೋಷಕರು ತಿಳಿಸಿದ್ದಾರೆ.

ದಾವಣಗೆರೆ ಜಿಲ್ಲೆ ಹರಿಹರ ಪಟ್ಟಣದ ಆಶ್ರಯ ಕಾಲನಿಯಲ್ಲಿ ವಾಸವಾಗಿರುವ ಚೈತ್ರಾ ಮತ್ತು ಮಂಜುನಾಥ್​ ದಂಪತಿಯ ಪುತ್ರಿ 7 ವರ್ಷದ ಪ್ರಾರ್ಥನಾ ಮೃತಪಟ್ಟ ಬಾಲಕಿ. ಈ ಘಟನೆ ನವೆಂಬರ್​ 11 ರಂದು ನಡೆದಿದೆ. ಅವಾಸ್ತವಿಕ, ಅತಿ ರಂಜಿತ ಧಾರವಾಹಿಗಳು ಶ್ರೀಸಾಮಾನ್ಯರ ಬದುಕು ಕಿತ್ತುಕೊಂಡಿವೆ ಎಂಬ ಗುರುತರ ಆರೋಪದ ನಡುವೆಯೇ ಈಗ ಮಕ್ಕಳ ಜೀವಕ್ಕೆ ಸಂಚಕಾರವಾಗಿರುವುದಕ್ಕೆ ಪುಷ್ಟಿ ದೊರೆತಂತಾಗಿದೆ. ಕೆಲ ದಿನಗಳ ಹಿಂದೆಯಷ್ಟೇ ಬ್ಲೂ ವೇಲ್ ಮೊಬೈಲ್ ಗೇಮ್​ ದೇಶದಾದ್ಯಂತ ಮಕ್ಕಳ ಜೀವವನ್ನು ಬಲಿ ಪಡೆದಿರುವುದು ಇನ್ನೂ ಕರಾಳ ನೆನಪಾಗಿ ಉಳಿದಿದೆ.